Leiðbeiningar fyrir skil á skattframtali einstaklinga – Skatturinn

Leiðbeiningabæklingur

Leiðbeiningar um útfyllingu skattframtals einstaklinga eru nær eingöngu sóttar á netið, hægt er að finna leiðbeiningabækling á PDF formi á heimasíðu Skattsins á https://skatturinn.is/einstaklingar/framtal-og-alagning/framtalsleidbeiningar/2025. Hægt er að fá leiðbeiningarnar á pappír með því að sækja þær á næstu starfsstöð Skattsins.

Frádráttur á framtali einstaklinga:

Frádráttarbær framlög til félaga sem skráð eru á almannaheillaskrá eru árituð í kafla 2.6, reit 155 Einungis er hægt að lækka fjárhæðina á framtalinu. Ef talið er að það vanti upplýsingar eða að árituð fjárhæð sé röng skal skila framtali, hafa samband við viðkomandi félag og óska eftir að félagið leiðrétti innsendar upplýsingar og svo þarf að óska eftir leiðréttingu á framtalinu.

Einungis gjafir og framlög skapa rétt til skattfrádráttar hjá gefanda. Þannig skapa félagsgjöld eða greiðslur fyrir vörur og þjónustu s.s. kaup á flugeldum eða álfinum ekki rétt til skattfrádráttar.

Frádráttur einstaklinga getur verið á bilinu 10.000 - 350.000 kr. á ári en hjá hjónum og sambúðarfólki alls 700.000 kr. og kemur það til lækkunar á útsvars- og tekjuskattsstofni
Móttakandi þarf að taka saman upplýsingar um framlaga hvers gefanda og skila þeim upplýsingum til Skattsins samhliða öðrum árlegum gagnaskilum fyrir 20. janúar ár hvert og er frádrátturinn áritaður á framtal gefanda.

Ívilnun

Í sumum tilfellum getur verið hægt að lækka tekjuskatts- og útsvarsstofn einstaklinga. Það á sérstaklega við Þá þarf að óska eftir lækkun (ívilnun) í skattframtali með því að fylla út fylgiskjal RSK 3.05 - Umsókn um lækkun. Á því koma fram upplýsingar um hvaða gögn þurfa að fylgja umsókn. Skilyrði fyrir lækkun er m.a. að lögð séu fram nauðsynleg gögn sem sýna fram á útlagðan kostnað.

Skatturinn hefur sett viðmiðunarreglur um lækkun á tekjuskattsstofni. Í reglunum koma fram fjárhæðir kostnaðar og önnur atriði sem að jafnaði skal horfa til við mat á umsókn og ákvörðun um lækkun.

Hægt er að sækja um lækkun vegna:

Veikindi, slys, ellihrörleiki eða mannslát
Veikindi/fötlun barns
Framfærsla vandamanna
Ungmenni 16-21 árs í námi
Eignatjón
Tapaðar kröfur

Við mat á ívilnun er fyrst og fremst litið á þann beina kostnað sem framteljandi hefur orðið fyrir á tekjuárinu og er umfram fengnar bætur og styrki. Þá þarf kostnaður að vera umfram það sem venjulegt er og þannig að gjaldþol umsækjanda sé skert.

Fyrir þurfa að liggja upplýsingar og gögn til staðfestingar á útlögðum kostnaði svo og læknisvottorð. Í undantekningartilvikum geta málsatvik verið þannig að ekki sé unnt að leggja fram nægjanleg gögn og metur ríkisskattstjóri þá fram komnar skýringar heildstætt og að álitum.

Það sem fyrst og fremst er litið á við mat á ívilnun:

Beinan kostnað sem er umfram fengnar bætur, styrki og aðrar greiðslur.
Hvort kostnaður er meiri en það sem venjulegt er og skerði gjaldþol umsækjanda.
Framlögð gögn til staðfestingar á útlögðum kostnaði og læknisvottorð.

Það sem telst til kostnaðar í þessu sambandi:

Lyfjakostnaður, staðfestur af lyfjaverslun.
Náttúrulyf tekin samkvæmt læknisráði.
Sjúkraþjálfun og sjúkranudd samkvæmt læknisráði.
Tannviðgerðir, ef þær eru afleiðing af sjúkdómum.
Tannréttingar, ef þær eru vegna sjúkdóma eða slysa sem ekki fást bætt.
Dvöl á heilsustofnunum samkvæmt læknisráði.
Kostnaður við glasa- eða tæknifrjóvgun.
Ferðakostnaðar sem er vegna veikinda/slysa og fæst ekki endurgreiddur.
Aukin útgjöld af notkun bíls vegna fötlunar eða hreyfihömlunar.
Kostnaður við sérútbúnað á heimili, vegna fötlunar.
Aðkeypt þjónusta og heimahjúkrun vegna ellihrörleika, sem umsækjandi greiðir sjálfur.
Dvalarheimiliskostnaður sem umsækjandi þarf að greiða sjálfur.

Það sem almennt telst ekki til kostnaðar

Almennar tannviðgerðir og tannréttingar.
Kostnaður vegna ættleiðingar. Þó er veittur frádráttur í skattframtali (reitur 157) á móti ættleiðingarstyrk úr ríkissjóði.
Gleraugu, nema ef kostnaður er verulegur og af sérstökum heilsufarslegum ástæðum.
Heyrnartæki, nema ef kostnaður er verulegur og af sérstökum heilsufarslegum ástæðum.

Frekari leiðbeiningar og upplýsingar um ívilnanir má finna á bls. 27 í leiðbeiningar bæklingi fyrir skattframtalið.

Lækkun vegna framfærslu námsmanns

Hægt er að sækja um ívilnun, skattalækkun, lækkun á sköttum ef framteljandi hefur á framfæri sínu barn eða ungmenni í framhaldsskóla sem ekki hefur nægar tekjur sér til framfærslu. Hér er einkum átt við námsmenn á aldrinum 16-21 árs. Ekki er hægt að sækja um lækkun ef barnið er í námi sem hægt er að fá námslán, lánshæfu námi, til dæmis í námi í háskóla.

Sótt er um með því að fylla út kafla 1.3 á forsíðu skattframtalsins forráðamanns en barnið þarf að vera búið að skila sínu skattframtali áður en sótt er um lækkun.

Hámarks lækkun á tekjuskatts- og útsvarsstofni við álagningu 2026 er 550.000 kr., ef námsmaður er tekjulaus. Frá þessari fjárhæð er dreginn 1/3 af tekjum námsmannsins, þannig að réttur framfæranda til ívilnunar fellur niður ef tekjurnar eru umfram 1.650.000 kr. á árinu 2025.

Styrkir

Meginreglan er að allir styrkir til einstaklinga teljast til skattskyldra tekna hvaðan sem styrkirnir koma. Styrkir eru skattlagðir eins og launatekjur og bera tekjuskatt og útsvar.

Í sumum tilfellum er þó heimilt að telja fram kostnað til frádráttar á móti styrknum.
Frádrátturinn getur aldrei verið hærri en fjárhæð styrksins sjálfs og ef kostnaðurinn er lægri en styrkurinn, þarf að greiða skatt af mismuninum. Ekki er leyfilegt að nota persónulegan kostnað til frádráttar á móti styrkjum.

Styrkir eiga að koma forskráðir á skattframtalið í kafla 2.3. Styrkir til náms, rannsókna- og vísindastarfa birtast í reit 131 og aðrir styrkir í reit 96. Frádráttur á móti styrkjum færist í kafla 2.6

Frádráttur á móti náms-, rannsóknar og vísindastyrkjum

Ef gerð er krafa um frádrátt vegna kostnaðar á móti náms-, rannsóknar- eða vísindastyrkjum, skal gera sundurliðaða grein fyrir honum á sérstöku yfirliti sem fylgir skattframtalinu með því að smella á Færa frádrátt í kafla 2.6. Heildarkostnaður færist þá í reit 149.

Frádrátturinn getur ekki orðið hærri en styrkur sem talinn er til tekna í reit 131 í kafla 2.3

Heimilt er að draga frá beinan kostnað, þó ekki persónulegan kostnað. Kaupverð tækja, s.s. tölvubúnaðar, er heldur ekki frádráttar bært.

Frádráttur á móti öðrum styrkjum

Ef gerð er krafa um frádrátt vegna kostnaðar á móti styrkjum til sérstakra verkefna eða starfstengdum greiðslum, án þess að um atvinnurekstur sé að ræða, skal gera sundurliðaða grein fyrir honum á sérstöku yfirliti sem fylgir framtalinu með því að smella á Færa frádrátt í kafla 2.6. Heildarkostnaður færist þá í reit 157. Kostnaður á móti tekjufærðum ættleiðingarstyrk frá Vinnumálastofnun færist einnig í þennan reit. Einnig frádráttur á móti samgöngugreiðslum, sem getur mestur orðið 132.000 kr á ári eða 11.000 kr á mánuði og kostnaður vegna líkamsræktar, að hámarki 81.000 kr.

Frádrátturinn getur ekki orðið hærri en móttekin greiðsla.

Frádráttur heimilast ekki á móti styrkjum vegna persónulegra útgjalda, s.s. vegna gleraugna, heyrnartækja, glasafrjóvgunar, krabbameinsskoðunar, ættleiðinga, tannviðgerða, sálfræðiþjónustu, dvalar á heilsustofnunum og útfarar.

Slysatrygging við heimilisstörf

Hægt er að óska eftir slysatryggingu við heimilisstörf með því að merkja í viðeigandi reit á forsíðu skattframtalsins.

Þau sem merkja í þann reit á skattframtalinu teljast slysatryggð við heimilisstörf frá 1. júní það ár fram til 31. maí árið eftir. Slysatryggingin gildir aðeins ef framtalinu var skilað á réttum tíma.
Iðgjald vegna tryggingarinnar er innheimt við álagningu opinberra gjalda, á álagningarseðli og er 550 kr.

Öll slys þarf að tilkynna innan eins árs og fer það fram í gegnum Sjúkratryggingar Íslands

Búseta á Íslandi hluta úr ári

Hjá þeim sem flutt hafa til eða frá landinu á tekjuárinu eru dagsetningar áritaðar í kafla 1.6 á skattframtalinu. Það eru brottflutnings- og/eða komudagar, samkvæmt upplýsingum frá þjóðskrá. Velja þarf Ný lína ef um er að ræða fleiri komu- og brottfarardaga.

Kaflinn er ekki birtur hjá þeim sem voru búsett allt árið á Íslandi. Telji framteljandi dagsetningar rangar þarf hann að leiðréttar þær. Ef áritun vantar, þarf framteljandi að skrá dagsetningar sjálfur í dálkinn Athugasemdir framteljanda í kafla 1.4.

Millifæra eigin peninga á milli landa

Þegar einstaklingar millifæra eigin pening milli landa og hægt er að sýna fram á að viðkomandi hafi sannanlega átt peninginn t.d. með afriti af skattframtali erlendis eða bankayfirliti þarf ekki að greiða skatt af fjárhæðinni þegar hún er millifærð til Íslands.

Gerð er grein fyrir millifærslunni í kafla 1.4 á skattframtalinu og viðeigandi gögn send með sem viðhengi. Fylgiskjöl eru hengd við framtali í loka skrefinu áður en framtali er skilað.

Hlutabréf

Hagnaður af sölu hlutabréfa myndar stofn til fjármagnstekjuskatts og er skattlagður samkvæmt skattframtali.

Hlutabréf eru færð inn á eyðublað RSK 3.19 sem er fylgiskjal í skattframtalinu. Hlutabréfaeign í lok árs er forskráð en það þarf að handskrá upplýsingar um allar aðrar breytingar t.d. kaup, sölu eða arðgreiðslur.

Þær upplýsingar ættu að koma fram á Sundurliðunarblaði samkvæmt innsendum hlutafjármiðum. Sundurliðunarblaðið er að finna á vinstri spássíu framtalsins.

Leiðbeiningar um skráningu hlutabréfa á eyðublað RSK 3.19 er hægt að finna á bls. 24-25 í leiðbeininga bæklingi fyrir skattframtalið.

Skrá upplýsingar um kaup, sölu eða arðgreiðslu hlutabréfa

Upplýsingar um breytingar á hlutabréfaeign, þ.m.t. kaup, sölu, lækkun hlutafjár o.fl., ásamt upplýsingum um arð eru færðar inn í þar til gerðar skráningarmyndir sem eru í 3 til 4 þrepum á fylgiskjali RSK 3.19.

Í þrep 1 eru skráðar upplýsingar um hlutabréf í eigu framteljanda í upphafi árs t.d. ef eldri hlutabréf vantar á framtalið
Í þrep 2 eru skráðar upplýsingar um hlutabréfakaup og aðrar breytingar til hækkunar á árinu 2025
Í þrep 3 eru skráðar upplýsingar um sölu hlutabréfa og aðrar breytingar til lækkunar á árinu 2025
Í þrep 4 eru skráðar upplýsingar um arðgreiðslur af hlutafé og afdregna staðgreiðslu.

Hafi verið gerðar aðrar breytingar en kaup/sala sem leiða til hækkunar/lækkunar þarf að velja rétta skýringu í felliglugganum Hvaða breytingar? undir Aðrar breytingar í þrepum 2 eða 3 eftir því sem við á.

Skrá nýtt félag

Ef skrá þarf inn hlutabréf í félagi sem ekki er á eyðublaði RSK 3.19 er kennitala skráð inn í fyrsta reitinn í auðri línu og smellt á bláu örina sem er á milli kennitölu og nafns félagsins.

Ef félagið er erlent er engin kennitala skráð en smellt beint á bláu örina.

Leiðbeiningar um skráningu hlutabréfa á eyðublað RSK 3.19 er hægt að finna á bls. 24-25 í leiðbeininga bæklingi fyrir skattframtalið.

Keypt hlutabréf á undirverði

Hlutabréf sem keypt voru samkvæmt kauprétti sem maður hefur öðlast vegna starfa fyrir annan aðila færast í kafla 2 á eyðublaðinu en í kafla 5 ef um erlend bréf eru að ræða. Til skattskyldra tekna telst mismunur á kaupverði samkvæmt kaupréttarsamningi og gangverði bréfanna þegar kaupréttur er nýttur. Skattlagning þessara tekna frestast þar til eigendaskipti verða á hlutabréfunum. Gera skal grein fyrir fjárhæð frestaðra tekna á eyðublaðinu.

Kaupréttarsamningar

Hafi starfsmaður gert kaupréttarsamning við félagið sem hann starfar hjá gilda í vissum tilvikum sérreglur um skattlagningu söluhagnaðar.

Kaupverðið færist inn á eyðublað RSK 3.19. Skattlagning kemur fyrst til við sölu bréfanna ef um söluhagnað er að ræða og fer þá eftir almennum reglum um söluhagnað hlutabréfa.

Til að falla undir þessa tegund skattlagningar þurfa bæði hlutafélagið og starfsmaðurinn að uppfylla ákveðin skilyrði, m.a. þarf kaupréttaráætlun að hafa náð til allra starfsmanna félagsins.

Erlend hlutabréf

Hlutabréf í erlendum félögum færast á eyðublaðið RSK 3.19 í reit 5 eins og form þess gefur tilefni til. Í stað kennitölu skal færa heimaland félagsins.

Kaupverð hlutabréfa miðast við gengi viðkomandi gjaldmiðils eins og það var þegar bréfin voru keypt. Færa skal hlutabréfaeign í íslenskum krónum.

Færa skal nafnverð og kaupverð hlutabréfa sem útgefin eru í erlendum gjaldmiðli á gengi eins og það var þegar hlutabréfin voru keypt. Nafnverð og kaupverð er því óbreytt í krónutölu á milli ára meðan ekki er um kaup, sölu eða aðra breytingu á eignarhluta í félaginu að ræða.

Arð skal færa á gengi þess tíma þegar hann var greiddur út.

Hlutafjárlækkun

Til að gera grein fyrir hlutafjárlækkuninni er smellt á bláu örina sem er milli kennitölu og nafns félagsins.

Upplýsingar um breytingar á hlutabréfaeign, þ.m.t. kaup, sölu, lækkun hlutafjár o.fl., ásamt upplýsingum um arð eru færðar inn í þar til gerðar skráningarmyndir sem eru í 3 þrepum. Farið er á milli skráningarmynda með því að smella á hnappana „Áfram“ eða „Til baka“.

Gengisskráning í árslok

Upplýsingar um gengi gjaldmiðla fyrir framtalsskil er hægt að finna á bls. 33 í leiðbeininga bæklingi fyrir skattframtalið.

Vistun í heimahúsi

Það gilda sérstakar reglur um tekjur fyrir vistun í heimahúsum og frádrátt á móti þeim. Hér er aðallega átt við vistun hjá dagforeldrum, sumardvöl barna í sveit, fósturbörn, stuðningsfjölskyldur fatlaðra barna og vistun aldraðra eða öryrkja.

Í sumum tilvikum er um að ræða atvinnurekstur og þarf þá að gera grein fyrir starfseminni á þann hátt en í öðrum tilvikum er svo ekki. Þá er að hluta gerð sú undantekning að í stað sannanlegs kostnaðar er heimilt að færa matsfjárhæðir til frádráttar, samkvæmt skattmati hverju sinni.

Dagvistun barna

Greiðslur fyrir dagvistun barna á að gera upp sem rekstrartekjur í skattframtali. Til frádráttar má færa sannanlegan kostnað af starfseminni. Í stað þess að sundurliða kostnað í rekstrarreikningi er heimilt að færa hámarksfrádrátt samkvæmt mati ríkisskattstjóra.

Frádráttur á móti tekjum vegna 2025 af fæðissölu í stað sannanlegs fæðiskostnaðar fyrir börn:

302 kr. fyrir hvern veittan morgunverð eða síðdegishressingu, en 391 kr. fyrir 12 ára og eldri
599 kr. fyrir hvern veittan hádegis- eða kvöldverð, en 779 kr. fyrir 12 ára og eldri.

Frádrátturinn má þó aldrei vera hærri fjárhæð en innheimt var fyrir fæði samkvæmt gjaldskrá.

Sem frádrátt í stað sannanlegs viðhaldskostnaðar húsnæðis og húsbúnaðar, kostnaðar vegna hreinlætisvara, bóka, bífreiðar o.þ.h. má færa til frádráttar á móti öðrum tekjum en vegna fæðissölu, 25% af þeim tekjum. Slíkur frádráttur má þó aldrei vera hærri fjárhæð en innheimt var vegna þessara liða skv. gjaldskrá.

Frekari upplýsingar um vistun í heimahúsum má finna á bls. 29 leiðbeininga bæklingi fyrir skattframtalið.

Sumardvöl barna

Greiðslur vegna sumardvalar barna á að gera upp sem rekstrartekjur. Til frádráttar má færa sannanlegan kostnað af starfseminni. Í stað þess að sundurliða kostnað í rekstrarreikningi er heimilt að færa hámarksfrádrátt samkvæmt mati ríkisskattstjóra.

Frádráttur á móti tekjum 2025 af fæðissölu í stað sannanlegs fæðiskostnaðar fyrir börn:

302 kr. fyrir hvern veittan morgunverð eða síðdegishressingu, en 391 kr. fyrir 12 ára og eldri
599 kr. fyrir hvern veittan hádegis- eða kvöldverð, en 779 kr. fyrir 12 ára og eldri.

Gera skal sérstakan rekstrarreikning fyrir þessa starfsemi en ekki blanda henni saman við aðra starfsemi sem t.d. er færð á landbúnaðarskýrslu.

Fósturbörn

Tekjur af reglubundinni starfsemi sem felst í að taka börn í fóstur frá barnaverndarnefnd eða meðferðarstofnunum skal gera upp sem rekstrartekjur. Til frádráttar má færa sannanlegan kostnað af starfseminni.

Ef ekki er um rekstur að ræða ber að færa greiðslur vegna fósturbarna til tekna og heimilt er að færa til frádráttar sannanlegan kostnað sem beint tengist tekjunum.

Í stað sannanlegs kostnaðar má í þessu tilviki færa frádrátt sem svarar til tvöfalds barnalífeyris vegna hvers barns, en þó aldrei hærri fjárhæð en greiðslunum nemur.

Á árinu 2025 nam tvöfaldur barnalífeyrir 1.048.800 kr. eða 2.873 kr. á dag.

Stuðningsfjölskyldur

Greiðslur til stuðningsfjölskyldna barna teljast að fullu til skattskyldra tekna, en á móti má færa til frádráttar beinan sannanlegan kostnað vegna umönnunar og dvalar barnanna. Í stað þess að sundurliða sannanlegan kostnað er heimilt að færa hámarksfrádrátt samkvæmt skattmati ríkisskattstjóra.

Frádráttur á móti tekjum 2025 í stað sannanlegs fæðiskostnaðar fyrir börn:

302 kr. fyrir hvern veittan morgunverð eða síðdegishressingu, en 391 kr. fyrir 12 ára og eldri
599 kr. fyrir hvern veittan hádegis- eða kvöldverð, en 779 kr. fyrir 12 ára og eldri.

Sem frádrátt í stað sannanlegs viðhaldskostnaðar húsnæðis og húsbúnaðar, kostnaðar vegna hreinlætisvara, bóka, bífreiðar o.þ.h. má færa til frádráttar á móti tekjum, 25% af þeim tekjum.

Frádrátturinn má þó aldrei vera hærri fjárhæð en greiðslurnar eru. Gera skal grein fyrir greiðslunum í kafla 2.3 á framtali og frádrætti í kafla 2.6, reit 157 skv. greinagerð sem fylgir vefframtali - Færa frádrátt.

Vistun aldraðra og öryrkja

Tekjur af reglubundinni starfsemi sem felst í vistun aldraðra og öryrkja skal gera upp sem rekstrartekjur. Til frádráttar má færa sannanlegan kostnað af starfseminni.

Greiðslur vegna vistunar aldraðra eða öryrkja í heimahúsum teljast að fullu til skattskyldra tekna, en á móti er heimilt að færa sannanlegan kostnað sem af vistuninni leiðir.

Þegar ekki er um að ræða atvinnurekstur má í stað sannanlegs kostnaðar færa frádrátt sem svarar til tvöfalds grunnellilífeyris, en þó aldrei hærri fjárhæð en greiðslunum nemur.

Fjárhæð þessi nam á árinu 2025 1.432.272 kr. eða 3.924 kr. á dag.

Skattalegt heimilisfesti

Þau sem dveljast erlendis við nám geta sótt um að halda hér á landi skattalegri heimilisfesti og haldið þannig sömu réttindum og ef þau byggju hér á landi.

Sækja þarf um árlega og er það gert með því að haka í reit á forsíðu skattframtalsins og fylla út eyðublað RSK 3.26 sem er fylgiskjal með framtalinu. Senda þarf gögn með umsókninni og ef þau berast ekki, er umsókninni sjálfkrafa hafnað.

Til þess að nám geti veitt rétt til skattalegrar heimilisfesti hér á landi þarf það að uppfylla ákveðin skilyrði.

Námið þarf að vera reglulegt og stundað við viðurkennda erlenda menntastofnun innan almenna menntakerfisins á framhalds- eða háskólastigi
Námið þarf að vera fullt starf
Námstími erlendis má ekki vera styttri en 6 mánuðir eða sem samsvarar 624 klst. á ári, þó að undanskyldu skiptinámi.

Nánari upplýsingar um skattalega heimilisfesti má finna á bls. 31 í leiðbeininga bæklingi fyrir skattframtalið. Viðeigandi gögn þurfa að fylgja umsókn. Þessi gögn eru: Vottorð um nám erlendis og Upplýsingar um tekjur erlendis.

Vottorð um nám erlendis
Árlega þarf að leggja fram staðfestingu frá skóla þar sem fram kemur:

hvaða nám var stundað og hve lengi á tekjuárinu
hvenær nám hófst
áætluð námslok

Upplýsingar um tekjur erlendis
Námsmaður og maki hans þurfa að leggja fram staðfestingu um tekjur eða tekjuleysi erlendis frá viðkomandi skattyfirvöldum. Nægilegt er að leggja fram:

Staðfest ljósrit af erlendum framtölum ef tekjur koma þar fram eða
Skriflegt tekjuvottorð frá erlendum skattyfirvöldum eða
Erlenda álagningarseðla eða staðfestingu á skattauppgjöri.

Einnig skal fylgja með framtali staðfesting á barnabótum eða sambærilegum greiðslum, fengnum erlendis á tekjuárinu.

Samsköttun einstaklinga

Einstaklingar í óvígðri sambúð eiga rétt á að telja fram saman og vera skattlögð sem hjón óski þau bæði eftir því. Sambúðarfólk sem skilar sameiginlegu skattframtali ber þá sameiginlega ábyrgð á þeim sköttum sem lagðir eru á samkvæmt skattframtali.
Með óvígðri sambúð er átt við sambúð tveggja einstaklinga aðra en hjónaband.

Skilyrði til samsköttunar eru:

Að eiga barn saman eða
Að eiga von á barni saman eða
Hafi verið í sambúð í samfellt eitt ár hið minnsta.

Hjón skila alltaf sameiginlegu skattframtali.

Óska eftir samsköttun

Einstaklingar í óvígðri sambúð, sem ekki hafa áður verið samsköttuð, geta sótt um samsköttun í kafla 1.2 á skattframtali. Fyrst þarf að staðfesta umsóknina með því að skrá veflykla beggja einstaklinga í reiti sem upp koma þegar framtalið er opnað í fyrsta sinn.

Sambúðarfólk með fjölskyldumerkingu 1 eða 2 sem telur sig eiga rétt á samsköttun, sækir um með því að haka við umsókn um samsköttun á forsíðu skattframtalsins og skráir kennitölu sambúðaraðila, Þetta þarf að gera á framtölum beggja svo umsóknin sé tekin gild

Ef óskað er eftir samsköttun á miðju tekjuári þarf að fylla út eyðublað RSK 5.47. Sú skráning er einungis til bráðabirgða og endanleg nýting persónuafsláttar sambúðarmaka við álagningu ræðst af því að skilað sé sameiginlegu skattframtali og forsendur til samsköttunar séu til staðar.

Reynist skilyrði ekki uppfyllt við álagningu fellur millifærður persónuafsláttur í staðgreiðslu niður.

Slíta samsköttun einstaklinga

Ef sambúðarfólk sem var samskattað á síðasta ári en óskar eftir því að slíta samsköttun þarf að senda tölvupóst á framtal@skatturinn.is með ósk sinni um að vera sérskattað áður en framtalið er opnað.

Hjón geta þó ekki óskað eftir sérsköttun, þau skila alltaf sameiginlegu framtali.

Skilnaður eða sambúðarslit einstaklingag

Hjón sem hafa skilið eða slitið samvistum og sambúðarfólk sem slitið hefur sambúð á árinu fá ekki sameiginlegt framtal. Þau geta valið um að telja fram hvort í sínu lagi allt árið eða að telja fram sameiginlega til skilnaðardags en í sitt hvoru lagi frá þeim degi til ársloka.

Hafi hjón samnýtt persónuafslátt, þannig að annað hefur nýtt persónuafslátt hins á staðgreiðsluárinu, skal telja þannig nýttan persónuafslátt þeim fyrrnefnda til góða en skerða persónuafslátt þess síðarnefnda sem því nemur. Báðir framteljendur skulu gera sérstaka grein fyrir þessari nýtingu í athugasemdareit á forsíðu skattframtalsins.

Dagpeningar

Dagpeningar sem greiddir eru vegna ferðalaga á vegum launagreiðanda er ætlað að standa undir kostnaði einstaklinga vegna fjarveru frá heimili sínu, s.s. gisti- og fæðiskostnaði og öðrum tilfallandi kostnaði sem af ferðinni hlýst.

Heimilt er að færa frádrátt á móti dagpeningum sem launþegi hefur fengið greidda frá launagreiðanda sínum ef öll eftirfarandi skilyrði eru uppfyllt:

Dagpeningarnir voru greiddir vegna tilfallandi ferða á vegum launagreiðanda.
Dagpeningarnir voru greiddir vegna ferða utan venjulegs vinnustaðar.
Launamaðurinn hefur sannanlega greitt ferðatengdan kostnað samkvæmt reikningi og geti sýnt fram á það.
Að fyrir liggi í bókhaldi launagreiðanda, sem og launamanns, gögn um tilefni ferðar og fjölda dvalardaga, fjárhæð ferðapeninga eða dagpeninga, svo og nafn og kennitala launamanns.

Greiddir dagpeningar eru áritaðir í kafla 2.2, reit 23 á skattframtalinu.

Frádrátt á móti dagpeningum þarf að skrá á fylgiskjali RSK 3.11 á skattframtalinu. Frádráttur þessi getur aldrei verið hærri en fengnir dagpeningar. Frádráttur vegna dagpeninga innanlands og erlendis færist í kafla 2.6, reit 33 á skattframtalinu.

Frekari upplýsingar um dagpeninga má finna á bls. 21 í leiðbeininga bæklingi fyrir skattframtalið.

Ökutækjastyrkur

Ökutækjastyrkur er greiðsla frá launagreiðanda til launþega fyrir notkun á eigin bifreið í starfi. Greiðslan getur bæði verið föst fjárhæð á mánuði og gjald fyrir hvern ekinn kílómetra samkvæmt akstursdagbók eða akstursskýrslu.

Ökutækjastyrkur er áritaður í reit 22 í kafla 2.2 á skattframtalinu.

Frádrátt á móti ökutækjastyrk má færa samkvæmt sérstökum reglum ef bifreið launþega hefur sannanlega verið notuð vegna aksturs í þágu vinnuveitanda.

Ekki má færa frádrátt á móti ökutækjastyrk sem var greiddur vegna ferða launþegans milli heimilis og vinnustaðar eða vegna annarra nota af bifreiðinni sem teljast til eigin nota hans.

Gera skal grein fyrir frádrætti á fylgiskjali RSK 3.04 á skattframtalinu og færist hann þá í reit 32 í kafla 2.6.
Ef ökutækjastyrkur í reit 1 á fylgiskjali RSK 3.04 er ekki hærri en 450.000 kr. þarf ekki að fylla út fylgiskjalið, ef áritaður frádráttur í reit 2 er réttur.

Leiðbeiningar um ökutækjastyrk og frádrátt frá honum er að finna á bls 28 í leiðbeininga bæklingi fyrir skattframtalið.

Samskotafé

Samskotafé, peningasöfnun og styrkir vegna veikinda eða slysa teljast ekki til skattskyldra tekna, enda gangi þeir beint til þeirra sem safnað er fyrir.

Upplýsingar um fengið samskotafé skal þó færa í reit C Aðrar skattfrjálsar tekjur í kafla 2.9 á skattframtalinu.

Vinningar, verðlaun og gjafir

Vinningar og verðlaun eru skattskyldar tekjur og bera tekjuskatt og útsvar eftir almennum reglum. Undantekning er þó verðlitlir vinninga í almennum happdrættum og keppnum og vinningar úr happdrættum sem hafa fengið sérstaka heimild ríkisskattstjóra til að greiða skattfrjálsa vinninga.

Listi yfir happdrætti sem hafa fengið heimild til að greiða skattfrjálsa vinninga er birtur árlega í leiðbeininga bæklingi fyrir skattframtalið. og má finna hann á bls. 11.

Vinningar úr happdrættum sem talin eru upp á þeim lista færast í lið B (reitur 597) í kafla 2.9 á skattframtalinu.

Aðrir vinningar færast í reit 96 Annað, hvað? í kafla 2.3

Hlunnindi

Hlunnindi eru hvers konar gæði sem einstaklingar fá og eru metin til peningaverðs. Þetta getur verið fatnaður, fæði, húsnæði, fríðindi, greiðslur í vörum eða afurðum og gjafir ef verðmætið er hærra en almennt gerist um tækifærisgjafir.

Hlunnindi sem launagreiðandi veitir starfsmanni til einkaþarfa teljast til skattskyldra tekna og metin eru til tekna miðað við markaðsverð eða gangverð, nema sérstakt matsverð gildi samkvæmt árlegu skattmati ríkisskattstjóra. Ef hlunnindi eru veitt gegn lægri greiðslu en markaðsverð eða skattmat, þá telst mismunurinn til tekna.

Bifreiðahlunnindi

Launamaður skal telja til tekna umráð yfir bifreið launagreiðanda samkvæmt árlegu skattmati, óháð því hvort bifreiðin er í eigu, leigu eða láni launagreiðanda.

Bifreiðahlunnindi eiga að koma árituð í í reit 134 í kafla 2.2 á skattframtalinu.

Við ákvörðun á fjárhæð bifreiðahlunninda skal miða við verð og aldur bifreiðar.

Verð til útreiknings á bifreiðahlunnindum má lækka um 10% á ári frá árinu eftir kaup, en ekki niður fyrir 50% af kaupverði. Mánaðarleg hlunnindi eru 1/12 af árshlunnindum og reiknast fyrir hvern byrjaðan mánuð.

Nánari upplýsingar um framtalsskil bifreiðahlunninda má finna á bls. 8 í leiðbeininga bæklingi fyrir skattframtalið.

fjárhæðir bifreiðahlunninda

Bifreið í eigu launagreiðanda:

Bifreið keypt 2014 eða síðar skal metin til tekna sem 28% af kaupverði fyrir bifreið knúin með jarðefnaeldsneyti, en 20% ef bifreiðin er knúin með rafmagni, vetni eða metan.
Ef bifreiðin var keypt 2013 eða fyrr þá 28% af verði samkvæmt Bifreiðaskrá viðkomandi árs

Bifreið sem ekki er í eigu launagreiðanda:

Ársumráð bifreiðar sem knúin er með jarðefnaeldsneyti skulu miðast við 28%, en 20% ef bifreiðin er knúin með rafmagni, vetni eða metan, af verði bifreiðarinnar samkvæmt verðlista viðkomandi bifreiðaumboðs þegar launagreiðandi fær umráð yfir bifreiðinni.

Ef bifreið gengur eingöngu fyrir rafmagni og starfsmaður greiðir sjálfur fyrir hleðslu, en launagreiðandi annast annan rekstrarkostnað, má lækka hlunnindahlutfall í 19% af verði bifreiðarinnar í stað 20%.

Önnur vélknúin ökutæki og flugvélar

Umráð yfir vélknúnum ökutækjum öðrum en bifreiðum skal færa til tekna sem hlutfall af kaupverði tækisins í samræmi við árlegt skattmat ríkisskattstjóra.
Færa skal til tekna 304.000kr. á hvern byrjaðan flugtíma vegna ferða í einkaþágu (30.000kr. ef um er að ræða litlar eins hreyfils flugvélar).

Upplýsingar um hlunnindi eiga að koma áritaðar á framtalið í kafla 2.2 og færast í reit 135.

Nánari upplýsingar um framtalsskil hlunninda má finna á bls. 8 í leiðbeininga bæklingi fyrir skattframtalið.

Fatahlunnindi

Ef starfsmaður fær afhentan fatnað til afnota skal telja þau hlunnindi til tekna á kostnaðarverði.

Undantekning frá þessu er einkennisfatnaður og nauðsynlegur öryggis- og hlífðarfatnaður sem starfsmenn fá til afnota og er ætlað að nota við störf sín. Slíkan fatnað skal ekki telja til skattskyldra hlunninda. Það sama á við um fatnað sem er auðkenndur eða merktur launagreiðanda og einkum nýttur vegna starfa fyrir hann.

Upplýsingar um fatahlunnindi eiga að koma áritaðar á framtalið í kafla 2.2 og færast í reit 135.

Fæðishlunnindi

Ef vinnuveitandi sér starfsmanni (eða fjölskyldu starfsmanns) fyrir fæði án endurgjalds á að meta það til skattskyldra tekna samkvæmt matsfjárhæð sem ákvörðuð er árlega í skattmati.

Ef starfsmaður greiðir fyrir fæði á að taka tillit til þess. Ef greitt er hærra verð fyrir máltíðir en matsfjárhæðir ríkisskattstjóra þá telst ekkert til tekna. Ef greitt er lægra verð en nemur matsfjárhæðum telst mismunurinn til tekna.

Fæði, sem launagreiðandi lætur starfsmanni og fjölskyldu hans í té endurgjaldslaust, skal metið starfsmanninum til tekna með eftirfarandi fjárhæðum. Heimilt er að lækka fjárhæðirnar um fjórðung ef um er að ræða fæði fyrir börn yngri en 12 ára.

Morgunverður 480kr.
Hádegis- eða kvöldverður 720kr.
Fullt fæði á dag 1.920kr.

Greidda fæðispeninga á hins vegar að telja til skattskyldra launatekna án nokkurs frádráttar.
Fæðishlunnindi eiga að koma áritaðar á framtalið í kafla 2.2 og færast í reit 135.
Nánari upplýsingar um framtalsskil hlunninda má finna á bls. 8 í leiðbeininga bæklingi fyrir skattframtalið.

Húsnæðishlunnindi

Endurgjaldslaus afnot starfsmanns af íbúðarhúsnæði skal meta til tekna hjá starfsmanninum samkvæmt árlegu skattmati ríkisskattstjóra. Ef rafmagn og hiti fylgir með skal telja þau hlunnindi til tekna á kostnaðarverði, þ.e. samkvæmt reikningum.

Fylgi starfi launamanns kvöð um búsetu í húsnæði sem launagreiðandi lætur honum í té, er ríkisskattstjóra heimilt að lækka hlunnindamatið ef launamaður telst ekki nýta húsnæðið að fullu. Íbúðarhúsnæði allt að 150m2 að viðbættum 5m2 fyrir hvern íbúa umfram 6 telst fullnýtt.

Húsnæðishlunnindi eiga að koma áritaðar á framtalið í kafla 2.2 á framtali og færast í reit 136.

Rafmynt

Hagnaður af sölu rafmyntar, s.s. Bitcoin eða Ethereum, er skattskyldur. Sama gildir um hvers konar aðra innlausn rafmyntar fyrir önnur verðmæti, s.s. skipti á einni tegund rafmyntar fyrir aðra. Þegar verið er að selja hluta af eign í tiltekinni rafmynt, sem keypt var í nokkrum skömmtum á mismunandi gengi, þá telst stofnverð hennar vera meðalkaupverð rafmyntarinnar.

Heimilt er að draga frá hagnaði af sölu rafmyntar sölutap sem varð af sölu rafmyntar sömu tegundar á sama ári.

Söluhagnaður af rafmynt fer í kafla 3.9, reit 522 á skattframtali. Gera þarf grein fyrir útreikningi söluhagnaðar á fylgiskjali með framtali (t.d. í excel skjali).

Eignfæra skal rafmynt í kafla 4.4, reit 15 á skattframtali, á markaðsverði hennar í árslok.

Frekari leiðbeiningar og upplýsingar um framtalsskil rafmynta má finna á bls. 13 og 15 í leiðbeininga bæklingi fyrir skattframtalið og sýnidæmi um útreikninga á söluhagnaði og eignfærslu á rafmynt í skattframtali er hægt að finna á bls. 33.

Skattlagning rafmynta

Skattlagning tekna af rafmynt er með ýmsum hætti og fer það eftir atvikum hverju sinni hvernig henni er háttað. Tekjur kunna þannig m.a. að vera skattlagðar í fjármagnstekjuskatti sem söluhagnaður, sem launatekjur eða sem atvinnurekstrartekjur. Skattskylda kann að vera fyrir hendi við móttöku rafmyntar og við innlausn.

Einstaklingur eða félag getur eignast rafmynt með ýmsum hætti. Um skattskyldu fer eftir almennum ákvæðum laga.

Eftirfarandi eru dæmi um skattskylda móttöku rafmyntar:

Ný rafmynt, s.s. vegna námugraftrar (e. mining)
Endurgjald vegna vinnu (laun eða verktakagreiðslur)
Gjafir, enda sé ekki um að ræða tækifærisgjafir þar sem verðmæti þeirra er ekki meira en almennt gerist um slíkar gjafir

Almennt verður að gera ráð fyrir að námugröftur sé í atvinnuskyni og er ný rafmynt sem verður til við námugröft því skattlögð sem atvinnurekstrartekjur. Tilfallandi og óverulegur námugröftur einstaklings telst þó ekki vera í atvinnuskyni. Álagður skattur á einstakling af slíkum tekjum er í almennu skattþrepi óháð því hvort öflun nýrrar rafmyntar sé utan eða innan atvinnurekstrar. Gjaldfærsla kostnaðar við öflun nýrrar rafmyntar er hins vegar eingöngu heimil sé námugröftur í atvinnuskyni.

Almennar reglur gilda þegar rafmynt er látin af hendi fyrir önnur verðmæti. Helstu dæmin um slík tilvik eru eftirfarandi:

Sala á rafmynt (skipti á rafmynt og peningum)
Skipti á einni tegund rafmyntar fyrir aðra
Greiðsla fyrir vöru eða þjónustu með rafmynt

Ekki myndast skattskylda þegar rafmynt er færð á milli veskja.

Sala og/eða innlausn verðbréfa og sjóða

Þau sem seldu eða innleystu verðbréf á tekjuárinu, skulu gera grein fyrir því á eyðublaði RSK 3.15 Sala/innlausn verðbréfa sem er fylgiskjal á skattframtalinu. Þetta á einnig við um sölu/innlausn spariskírteina og kúlubréfa og uppgjör afleiðusamninga. Þær niðurstöður sem færðar eru inn á eyðublað RSK 3.15 færast sjálfkrafa í kafla 3.3 á skattframtalinu.

Hafi seljandi verið búinn að fá afborganir af bréfinu á árinu 2025 skal færa þær vaxtatekjur sem þá fengust greiddar í reit 1 á eyðublaðinu.

Afleiðusamningar sem gerðir voru upp á árinu 2025 ber að færa í sérstakan kafla á RSK 3.15. Hagnaður umfram tap af uppgjöri afleiðusamninga færist þá sjálfkrafa í reit 522 í kafla 3.9 á skattframtalinu, en tap færist ekki á framtalið.

Frekari leiðbeiningar og upplýsingar um sölu/innlausn verðbréfa og sjóða má finna á bls. 26 í leiðbeininga bæklingi fyrir skattframtalið.

Greidd leiga (húsaleiga)

Á fylgiskjali RSK 2.02 í skattframtali skal gera grein fyrir greiddri leigu á árinu 2025. Greina skal frá hver er viðtakandi greiðslunnar, fyrir hvað er verið að greiða, leigutímabil ársins (DD.MM.ÁÁÁÁ) og heildarfjárhæð greiddrar leigu ársins.

Hér er framteljandi að gera grein fyrir þeim leigugreiðslum (útgjöldum) sem hann greiddi öðrum vegna leigu. Hér á ekki að færa þær leigutekjur sem framteljandi hefur af útleigu eigna sinna (þær færast á eyðublað RSK 3.25 eða á rekstrarskýrslu).

Þegar leigutekjur eru skráðar á skattframtalið þarf að setja inn upplýsingar um Fastanúmer eignarinnar ásamt stærð leigðs rýmis í fermetrum (m2). Hægt er að nálgast upplýsingar um fastanúmer og fermetrastærð eigna á heimasíðu HMS.

Ökutæki á framtali

Bifreiðaeign í árslok færist í kafla 4.3 á framtali einstaklinga.
Heimilt er að færa verð bifreiða niður um 10% frá því verði sem þær voru taldar til eignar á framtali síðasta árs.
Á vefframtal eru árituð fastanúmer bifreiða. Hafi framteljandi átt bifreiðina árið áður er verð hennar einnig áritað, niðurfært um 10%, en annars þarf að færa inn kaupverðið handvirkt.

Þegar um er að ræða kaupleigubifreið eru vaxtagjöld og eftirstöðvar bifreiðalána færðar í kafla 5.5 á framtalinu. Fjármögnunar- og rekstrarleigubifreiðar án uppkaupsákvæða í samningi eignfærast ekki hjá leigutaka.

Á sundurliðunarblaði eru tilgreindar allar bifreiðir sem skráðar eru á framteljendur skv. ökutækjaskrá Samgöngustofu. Beiðni um afskráningu eða leiðréttingu á skráningu bifreiða skal beina til Samgöngustofu.
Gera skal grein fyrir kaupum og sölum á bifreiðum í kafla 1.4 á skattframtali. Greina skal frá verði eignar, kennitölu kaupanda eða seljanda og hvenær afhending fór fram.

Aðrar eignir t.d. hjólhýsi, fellihýsi, tjaldvagn, bátur, vélsleði, vélhjól o.fl. skulu taldar fram á kaup- eða kostnaðarverði í kafla 4.4.

Gera upp alla álagninguna 1. júní í stað þess að dreifa greiðslum á sjö gjalddaga

Ef niðurstaða álagningar er skuld, er greiðslunum sjálfkrafa dreift á 3-7 gjalddaga frá júní til og með desember. Ef framteljandi óskar eftir því að gera upp alla álagninguna sína á einum gjalddaga þann 1. júní, í stað þess að dreifa greiðslum á fleiri gjalddaga, skal haka í þar til gerðan reit í kafla 1 á skattframtalinu. Hægt er að breyta þessu vali eftir að framtali hefur verið skilað, þar til 30. apríl. Eftir þann tíma er ekki lengur unnt að breyta þessu vali! Hjá þeim sem óska eftir einni greiðslu fellur heildarskuldin á gjalddaga 1. júní. Eindagi skattaálagningar sem fellur í gjalddaga 1. júní er síðasti virki dagur júní mánaðar og leggjast dráttarvextir á alla ógreidda álagningu frá gjalddaga, ef ekki er greitt fyrir eindaga. Sé óskað eftir að breyta fyrra vali skal það gert á þjónustusíðunni www.skattur.is undir Mínar stillingar.

Upphæðin er dregin af launum maí mánaðar hjá þeim sem eru með skráðan launagreiðanda en aðrir fá kröfu í heimabanka.

Reitur 96. Aðrar greiðslu

Í reit 96 í kafla 2.3 á skattframtalinu eru meðal annars færðar upplýsingar um ýmissa styrki, gjafir (þó ekki tækifærisgjafir ef verðmæti þeirra er ekki meira en gerist almennt um slíkar gjafir) og skattskylda vinninga.

Í reit 196 koma forskráðar verktakagreiðslur, allt að 1.000.000 kr. Ef telja þarf fram kostnað á móti þeim tekjum þarf að færa greiðslurnar á rekstraryfirlit RSK 4.10. Þá þarf að passa að núlla út upphæðina í reit 196, annars verða þær tvítaldar á framtalinu.

Verktakagreiðslur allt að 2.000.000 kr. skulu færast á rekstraryfirlit RSK 4.10 en greiðslur yfir 2.000.000 kr. eru skráðar á rekstrarskýrslu RSK 4.11

Frekari leiðbeiningar og leiðbeiningar og upplýsingar um aðrar greiðslur má finna á bls. 10 í leiðbeininga bæklingi fyrir skattframtalið.

Leigutekjur

Ef um er að ræða leigutekjur af útleigu íbúðarhúsnæðis sem fellur undir húsaleigulög og er til búsetu leigjanda eru þær skráðar á fylgiskjali RSK 3.25 með skattframtalinu. Fylgiskjalið er staðsett á vinstri spássíu framtalsins.
Draga má kostnað vegna hita og/eða rafmagns frá framtalinni leigu sé það tekið fram í leigusamningi að kostnaðurinn sé innifalinn í leigunni. Frádráttinn á að miða við sannanlegan kostnað skv. reikningum en ekki fasta tölu í hverjum mánuði.
Skráðar upplýsingar á fylgiskjalinu færast sjálfkrafa í reit 510 í kafla 3.7 á skattframtalinu.

Tekjur af útleigu annarra eigna eða eignaréttinda, sem ekki telst til atvinnurekstrar, skal færa í reit 511 í kafla 3.7. Þar skal skrá brúttótekjur, án frádráttar. Hér færist einnig útleiga á lausafé, t.d. bifreiðum og hjólhýsum.

Athugið að eyðublað RSK 3.25 (reit 510 á framtali) er ekki nota fyrir skammtímaútleigu á gistirými, t.d. til ferðamanna hvort sem um er að ræða heimagistingu eða gististarfsemi! Tekjur vegna heimagistingar (t.d. Airbnb og booking.com) á að setja í reit 511. En er þetta er gististarfsemi þá eru þær tekjur skráðar á rekstrarblöð með skattframtalinu.

Frekari leiðbeiningar og upplýsingar um leigutekjur má finna á bls. 13 í leiðbeininga bæklingi fyrir skattframtalið.

Leiga á móti leigu

Þau sem fá leigutekjur af útleigu íbúðarhúsnæðis sem fellur undir húsaleigulög og er til búsetu leigjanda og á sama tíma greiða leigugjöld vegna íbúðarhúsnæðis til eigin nota, er heimilt að draga leigugjöldin frá leigutekjum (leiga á móti leigu).
Þá þarf að fylla út fylgiskjal RSK 2.02 Greidd leiga og RSK 3.25 Leigutekjur ásamt því að fylla út upplýsingar um Tekjur og gjöld neðst á fylgiskjali RSK 3.25

Ef leigutekjur eru hærri en greidd leiga færist mismunurinn til tekna í skattframtali, en ef greidda leigan er hærri en leigutekjurnar færist ekkert til tekna í skattframtalinu. Reiknist leigutekjur mynda þær stofn til fjármagnstekjuskatts.

Sé óskað eftir að færa greidda leigu erlendis til frádráttar leigutekjum, þarf að leggja fram afrit af hinum erlenda leigusamningi sem viðbótargögn.
Fylla skal út fylgiskjalið RSK 3.25 Leigutekjur fylgiskjalið er staðsett á vinstri spássíu framtalsins.

Frekari leiðbeiningar og upplýsingar um leigu á móti leigu má finna á bls. 13 og 31 í leiðbeininga bæklingi fyrir skattframtalið..

Innistæður í erlendum bönkum

Eignir erlendis ber að telja fram á framtali á sama hátt og um eignir hér á landi væri að ræða.
Innistæður í erlendum bönkum skal færa í kafla 3.2. Þær færast til eignar í íslenskum krónum á kaupgengi í árslok, í reit 321. Vaxtatekjur af þeim færast í reit 322 þegar þær eru lausar til ráðstöfunar.

Upplýsingar um gengi í árslok 2024 er hægt að finna á bls. 33 og nánari upplýsingar um tekjur og eignir erlendis eru á bls. 30 í leiðbeininga bæklingi fyrir skattframtalið..

Erlendar eignir

Eignir erlendis ber að telja fram á framtali á sama hátt og um eignir hér á landi væri að ræða.
Erlendar fasteignir skal færa í kafla 4.2 reit 326 á skattframtali. Þær skulu færðar á fasteignamatsverði umreiknuðu í íslenskar krónur miðað við gengi í árslok 2025 Sé fasteignamat ekki fyrir hendi skal miða eignfærslu við kaupverð umreiknað í íslenskar krónur á gengi í árslok 2025.
Erlendar verðbréfaeignir skal telja fram í kafla 3.3 og erlendir peningar í kafla 4.4. Eignirnar skal telja fram í íslenskum krónum á viðeigandi gengi í árslok.

Höfundaréttargreiðslur

Skilaskyldum aðilum ber að draga staðgreiðslu fjármagnstekjuskatts af höfundarréttargreiðslum til einstaklinga sem heimilisfastir eru hér á landi og viðkomandi einstaklingur telur greiðslurnar síðan fram í skattframtali sínu.

Á þetta við um greiðslur til allra einstaklinga sem eru rétthafar slíkra greiðslna, þ.e. hvort sem þeir stunda atvinnurekstur eða ekki og hvort sem þeir eru sjálfir höfundar að viðkomandi verkum eða ekki.

Höfundarréttargreiðslur eru taldar fram í kafla 3.10 á skattframtali. Þar eru færðar upplýsingar um höfundarréttargreiðslur vegna síðari afnota hafi þær ekki verið áritaðar. Sé greiðandi erlendur skal færa inn kennitöluna 999999-9999, nafn greiðanda og í hvaða landi greiðandi er.

Upplýsa skal um tegund greiðslu, s.s. vegna tónverks eða ritverks. Hjón og samskattað sambúðarfólk ber að gera grein fyrir hvort þeirra er eigandi greiðslunnar.

Færa lán inn á framtal

Á rafrænu sundurliðunarblaði með framtalinu koma fram upplýsingar um lán frá bönkum, sparisjóðum og Íbúðalánasjóði. Ef fyrir liggur að lánið sé vegna íbúðarhúsnæðis til eigin nota er það fært af sundurliðunarblaði yfir í kafla 5.2 á framtali en öll önnur lán fara í kafla 5.5.

Sundurliðunarblaðið er að finna á vinstri spássíu framtalsins, undir Framtal 2025

Þegar ekki liggja fyrir upplýsingar um hvort þessi lán veiti rétt til vaxtabóta eru þau ekki árituð á framtalið og þarf framteljandi sjálfur að færa þau á viðeigandi stað.

Frekari leiðbeiningar og leiðbeiningar með að færa lán inn á framtal er hægt að finna á bls. 15 – 17 í leiðbeininga bæklingi fyrir skattframtalið.

Lán frá einstaklingum

Sé um að ræða lán sem fengið er frá einstaklingum, þar með talin lán frá foreldrum eða öðrum tengdum aðilum, er það fært inn í kafla 5.5 hjá lántakanum eða kafla 5.2 ef um er að ræða lán vegna fasteignakaupa en lánveitandinn færir lánið í kafla 3.3 á sínu framtali, ef sá einstaklingur er skattskyldur á Íslandi.

Skattframtal barns - barnaframtal

Börn yngri en 16 ára (fædd árið 2010 eða síðar) greiða ekki tekjuskatt og útsvar af fyrstu 180.000 kr. af launatekjum sínum á árinu 2025. Eftir sem áður skal telja allar launatekjur barns fram á barnaframtali. Gera skal grein fyrir tekjunum á sérstöku framtali, Skattframtal barns RSK 1.02. Aðeins 1. kafli framtals er þá fylltur út. Rita skal nafn og kennitölu barns og foreldris (framfæranda) á framtalið og skiptir ekki máli hvort skráð er kennitala föður eða móður. Afdregna staðgreiðslu af launatekjum barna skal færa í reit 296 í kafla 1.4 á framtali barnsins.
Barnaframtal er að finna á þjónustusíðu framfæranda undir: Framtal > Netframtal > Framtal barns

Á barnaframtal færast ekki aðrar tekjur en launatekjur. Aðrar tekjur færast á framtal framfæranda í viðeigandi reiti. Vaxtatekjur af bankainnstæðum og verðbréfum barna færast í lið 3.4 á framtali framfæranda. Aðrar eignatekjur færast með eignatekjum framfæranda. Sama gildir um eignir barns og skuldir, þær færast með eignum og skuldum framfæranda í kafla 3, 4 og 5 á framtali þeirra.

Börn sem eru 17 ára og eldri eiga að skila sínu eigin skattframtal á sinni þjónustusíðu á www.skattur.is

Sérskattlagning barna

Ef óskað er sérskattlagningar barns, sem misst hefur annað foreldri sitt eða bæði og ekki verið ættleitt, þarf að fylla út kafla 2 á skattframtali barns. Launatekjur færast í kafla 1, en bætur, styrkir og aðrar greiðslur í kafla 2.

Með barnaframtalinu skal skila síðum 3 og 4 af skattframtali einstaklinga, vegna eignatekna og vegna eigna og skulda. Þeim gögnum er einungis hægt að skila á pappír.

Ef fallist er á umsókn um sérskattlagningu skattleggjast allar tekjur samkvæmt 1. og 2. kafla eins og launatekjur barna, þ.e. 6% tekjuskattur á allar tekjur umfram frítekjumark sem er 180.000 kr.

Fjármagnstekjur samkvæmt kafla 3 (bls. 3 á skattframtali einstaklinga) bera fjármagnstekjuskatt. Frítekjumark vegna vaxtatekna og tekna af hlutabréfaeign í formi arðs og söluhagnaðar í félögum skráðum á skipulegum verðbréfamarkaði eða markaðstorgi fjármálagerninga er samtals 300.000 kr.

Umsókn um lækkun vegna framfærslu ungmenna

Hægt er að sækja um ívilnun vegna framfærslu ungmenna í kafla 1.3 í skattframtalinu. Þar skal tilgreina nafn skóla eða ástæðu umsóknar, sérstaklega er átt við ungmenni á aldrinum 16-21 árs. Veiti námið rétt til námslána kemur lækkun ekki til álita. Við afgreiðslu umsóknar verða rauntekjur skv. framtali ungmennis notaðar því er það skilyrði fyrir lækkun að ungmenni sem um ræðir hafi skilað framtali.

Foreldrar sem ekki eru samvistum, en hafa sameiginlegt forræði og annast báðir framfærslu ungmennis, geta hvort um sig sótt um lækkun. Lækkuninni er þá skipt jafnt á milli þeirra.

Nánari upplýsingar um lækkun vegna framfærslu ungmenna er á bls. 7 í leiðbeininga bæklingi fyrir skattframtalið.

Erlendar tekjur skráðar á framtal

Hafi framteljandi aflað launatekna erlendis, á sama tíma og hann var heimilisfastur hér á landi, ber honum að gera grein fyrir þeim tekjum í kafla 2.8 á framtali. Hér er átt við hvers konar launatekjur, lífeyri og starfstengdar greiðslur.

Tilgreina skal í hvaða landi teknanna er aflað og fjárhæð í erlendri mynt, sem og greidda skatta erlendis. Fjárhæðina skal umreikna í íslenskar krónur á meðalgengi þess tímabils þegar teknanna var aflað.

Upplýsingar um meðalgengi hvers mánaðar 2025 er hægt að finna á bls. 33 og nánari upplýsingar um erlendar tekjur eru á bls. 30 í leiðbeininga bæklingi fyrir skattframtalið..

Sé um að ræða tekjur frá ríki sem ekki er tvísköttunarsamningur við skal leggja fram staðfestingu um greidda skatta erlendis. Hafi tekna verið aflað í ríki sem í gildi er tvísköttunarsamningur við er meðferð tekna í álagningu í samræmi við ákvæði viðeigandi tvísköttunarsamnings. Mismunandi er eftir samningum hvaða aðferð er beitt til að komast hjá tvísköttun og e.t.v. eru tekjurnar skattskyldar á Íslandi að fullu.

RSK 3.02 Kaup og sala eigna

Þeir sem kaupa og/eða selja íbúðarhúsnæði eða aðrar eignir sem ekki tengjast atvinnurekstri skulu gera grein fyrir því á eyðublöðum fyrir kaup og sölu eigna RSK 3.02.
Um er að ræða tvö aðskilin eyðublöð, annað fyrir eignakaup og hitt fyrir sölu eigna. Fyrir framtalsgerðina nú hafa, eftir atvikum, verið áritaðar á þessi eyðublöð upplýsingar frá Húsnæðis- og mannvirkjastofnun (HMS) um fasteignaviðskipti á árinu 2025.

Kaup eigna

Sé um íbúðarkaup að ræða, þ.m.t. kaup á búseturétti, þarf að koma fram hvort húsnæðið sé til eigin nota.
Með eigin notum er átt við að húsnæðið sé nýtt til íbúðar af eiganda þess sjálfum. Ef sérstakar tímabundnar aðstæður, svo sem nám, veikindi eða atvinnuþarfir, valda því að eigandi íbúðarhúsnæðis getur ekki sjálfur nýtt það til íbúðar, telst það samt sem áður vera til eigin nota.
Með tímabundnum aðstæðum er átt við að eigandi íbúðarhúsnæðis telji líklegt að hann muni innan ákveðins tíma taka húsnæðið til eigin nota.

Frekari leiðbeiningar og skýringar er að finna á bls 22-23 í leiðbeininga bæklingi fyrir skattframtalið..

Sala eigna

Fylla þarf inn upplýsingar um eignina sem ekki eru áritaðar sem og greidd sölulaun vegna sölunnar. Verðbreytingarstuðlar eru innbyggðir og útreikningur söluhagnaðar sjálfvirkur.
Með einföldum hætti er merkt við hvers konar eign var seld, hver eignarhaldstíminn var og hvernig söluhagnaði skuli ráðstafað. Skattfrjáls hagnaður af sölu íbúðarhúsnæðis og frístundahúsnæðis fer í reitinn „Skattfrjáls söluhagnaður“ en flyst ekki á framtal.
Skattskyldur hagnaður, t.d. af sölu hesthúss, flyst sjálfkrafa í lið 3.9 á framtali.

Sölulaun

Sölulaun er beinn kostnaður við sölu fasteignar t.d. söluþóknun og gagnaöflunargjald og er oftast greiddur fasteignsala eða lögmanni. Heimilt er að draga sölulaun frá söluhagnaði fasteigna og er gert grein fyrir þeim kostnaði í RSK 3.02.

Fenginn arfur - áritun á skattframtal

Gera skal grein fyrir fengnum arfi í kafla 1.5 á framtali, þ.m.t. fyrirframgreiddum arfi. Í fremsta reitinn skal tilgreina kennitölu arfláta. Ef arfláti hafði ekki íslenska kennitölu skal
setja kennitöluna 999999-9999

Í næsta reit skal færa heildarfjárhæð fengins arfs og í síðasta reitinn greiddan erfðafjárskatt.

Arf erlendis frá skal færa í íslenskum krónum á gengi á greiðsludegi. Staðfesting á greiddum erfðafjárskatti erlendis þarf að fylgja framtalinu sem fylgiskjal.

Fylgiskjöl eru hengd við framtali í loka skrefinu áður en framtali er skilað.

Sundurliðunarblað

Á Þjónustuvefnum www.skattur.is undir Almennt og Innkomnar upplýsingar er hægt að sjá sundurliðunarblað, þær upplýsingar sem ríkisskattstjóri hefur móttekið frá launagreiðendum og öðrum aðilum. Upplýsingarnar eru á ábyrgð sendanda. Ef talið er að þær séu rangar þarf að óska eftir leiðréttingu hjá þeim sem sendi þær.

Áritun á skattframtalið mun taka mið af þessum upplýsingum auk þeirra upplýsinga sem berast fram að því að þú opnar skattframtalið í fyrsta skipti. Þessar upplýsingar birtast einnig á sundurliðunarblaðinu.

Vanti upplýsingar á framtalið þarf að breyta framtalinu og bæta viðkomandi upplýsingum við. Einnig er hægt að leiðrétta áritaðar upplýsingar. Gera þarf grein fyrir þeim leiðréttingum í kafla 1.4

Sundurliðunarblaðið er ekki hluti af framtalinu heldur hefur að geyma frekari sundurliðun þeirra upplýsinga sem búið er að árita (forskrá) á framtalið auk upplýsinga sem eiga erindi inn á framtalið en ekki liggur fyrir við áritun í hvaða reiti þær eigi að rata, s.s. lánaupplýsingar. Hjá sumum framteljendum eru að auki upplýsingar sem ekki voru færðar inn á framtal en eiga e.t.v. erindi þangað.

Framteljandi þarf að staðfesta á sundurliðunarblaði að hann hafi lesið upplýsingar og tilmæli um erlenda bankareikninga og peningarlegar eignir með því að haka við "Lesið".

Viðbótargögn

Hægt er að skila inn viðbótargögnum með skattframtalinu.
Í síðasta skrefinu þegar óskað er eftir að þú staðfestir sendingu á framtali er möguleiki fyrir neðan til þess að hlaða inn skjölum og skila viðbótargögnum á sama tíma og framtalinu

Hafi framtali þegar verið skilað er hægt að skila viðbótargögnum í gegnum þjónustuvefinn www.skattur.is með því að smella á Framtal og síðan Leiðréttingar og Viðbótargögn.

Fjölskyldumerking

Fjölskyldumerking á skattframtali segir til um fjölskyldustöðu í þjóðskrá 31. desember 2025

Fyrsta tákntalan segir til um hjúskaparstöðu:
1 - einhleypingur
2 - einhleypingur með börn yngri en 18 ára
3 - hjón
6 - samskattað sambúðarfólk
7 - sambúðarfólk sem hafði rétt rétt til samsköttunar á sl. ári en var ekki samskattað
x (stjarna) - nýhafin sambúð
9 - framteljandi sem misst hefur maka sinn á sl. ári

Önnur tákntalan segir til um fjölda barna yngri en 7 ára og þriðja talan segir til um fjölda barna á aldrinum 7-17 ára á framfæri framteljanda.

Fjölskyldumerkingin 3+1+1 Þýðir til dæmis Hjón með eitt barn yngra en 7 ára og eitt á aldrinum 7-17 ára

Ef fjölskyldumerkingin er röng þarf að senda leiðréttingu til Þjóðskrár Íslands

Villur á skattframtali

Þegar búið er að færa inn allar upplýsingar á skattframtalið þarf að smella á Villuprófa. Þá sést hvort einhverjar villur eru sem þarf að leiðrétta. Ef einungis er um Ábendingu að ræða er hægt að skila inn skattframtalinu ef ábendingin á ekki við.

Villutilkynningin segir til um hver villan er og hvað þarf að leiðrétta. Hægt er að smella á villuna til þess að fara á þann stað í skattframtalinu sem villan tengist.

Villur geta komið ef t.d. eru settar upplýsingar í einhvern reit en engin fjárhæð á móti eða ef sett er 0 (núll) þar sem ekki á að vera fjárhæð. Til þess að leiðrétta þannig villur þarf að þurrka út þær upplýsingar sem ekki eiga að vera.

Húsbyggingarskýrsla

Á Húsbyggingarskýrslu RSK 3.03 skal skrá upplýsingar um byggingu, viðbyggingu, breytingar og endurbætur á fasteignum og sundurliða kostnað sem hefur fallið á árinu. Þar skal einnig tilgreina eigin vinnu, gjafavinnu og skiptivinnu.

Velja skal byggingarstig í árslok úr fellilista. Byggingarstig eru í samræmi við staðal, ÍST51:2021, sem stuðst er við í skráningu mannvirkja hjá HMS. Samkvæmt staðlinum er um að ræða neðangreind fjögur byggingarstig:

Byggingarleyfi. Dagsetning miðast við útgáfu byggingarleyfis leyfisveitanda.
Fokheld bygging. Dagsetning miðast við úttekt á fokheldi - ef hún er ekki gerð miðast við skoðun á eigninni.
Fullgerð bygging að utan og tilbúin til innréttingar. Dagsetning miðast við skoðun á eigninni.
Fullgerð bygging. Dagsetning miðast við skoðun/lokaúttekt á eigninni af hálfu viðkomandi yfirvalds.

Gera skal grein fyrir eigin vinnu við húsbygginguna á eyðublaðinu svo og gjafavinnu og skiptivinnu.

Annars vegar skal tilgreina aukavinnu sem eigandi leggur fram utan venjulegs vinnutíma við byggingu íbúðarhúsnæðis til eigin afnota. Vinna manns við eigin íbúð utan venjulegs vinnutíma er skattfrjáls ef hann uppfyllir eftirgreind tvö atriði:
a) að hafa unnið fullan vinnutíma við hið eiginlega starf sitt og
b) skilað eðlilegum árstekjum af því.

Hins vegar skal tilgreina eigin vinnu við íbúðarhúsnæði til eigin afnota, unna í venjulegum vinnutíma, svo og alla aðra skattskylda vinnu eiganda við húsbyggingu, svo sem við íbúðarhúsnæði sem ekki er ætlað til eigin afnota, sumarbústaði o.þ.h. Enn fremur verðmæti skiptivinnu í sambandi við eigin húsbyggingu. Önnur eigin vinna og gjafavinna færist í ótölusettan reit í lið 2.3 á framtali

Viðmiðunarverð fyrir eigin vinnu er:
Ófaglærð vinna: kr. 2.857 pr. klst.
Faglærð vinna: kr. 3.568 pr. klst.

Upplýsingar um heildarkostnað frá fyrra ári má finna í húsbyggingarskýrslu frá síðasta framtali.

Nánari upplýsingar um má finna á bls. 23 í leiðbeininga bæklingi fyrir skattframtalið.

Nýsköpun skattfrádráttur

Nýsköpunarverkefni, sem hlotið hafa staðfestingu frá Rannís eiga rétt á sérstökum skattfrádrætti vegna nýsköpunar.

Með opinberum stuðningi við nýsköpunarverkefni er átt við skattfrádrátt og styrki frá opinberum aðilum, samanlagt. Njóti verkefnið opinberra styrkja hafa þeir áhrif á fjárhæð skattfrádráttar.

Gera þarf grein fyrir útlögðum kostnaði og fengnum styrkjum á fylgiskjali RSK 4.21 með skattframtali.

Gera þarf grein fyrir öllum eigendum verkefnisins á fylgiskjali RSK 4.22 með skattframtali

Tekjuskattsstofn

Tekjuskattsstofn er ákvarðaður í skattframtali. Tekjuskattstofn má finna í lið 2.7 í skattframtali einstaklinga og á álagningarseðli. Stofn til útreiknings tekjuskatts og útsvars er samtala liða 2.1 til 2.5 á skattframtali að frádreginni fjárhæð í lið 2.6.

2.1 Launatekjur og starfstengdar greiðslur
2.2 Ökutækjastyrkur, dagpeningar, hlunnindi
2.3 Lífeyrisgreiðslur, greiðslur frá Tryggingastofnun, aðrar bótagreiðslur, styrkir
2.4 Reiknað endurgjald
2.5 Hreinar tekjur af eigin atvinnurekstri
2.6 Frádráttur

Villur og/eða ábendingar á skattframtali

Þegar búið er að færa inn allar upplýsingar á skattframtalið þarf að smella á "Villuprófa". Þá sést hvort einhverjar villur eru sem þarf að leiðrétta. Ef einungis er um "Ábendingu" að ræða er hægt að skila inn skattframtalinu ef ábendingin á ekki við. Ábendingar eru einungis til að vekja athygli á ef eitthvað hefur gleymst eða vantar.

Villutilkynningin segir til um hver villan er og hvað þarf að leiðrétta. Hægt er að smella á villuna til þess að fara á þann stað í skattframtalinu sem villan tengist.

Villur geta komið ef t.d. eru settar upplýsingar í einhvern reit en engin fjárhæð á móti eða ef sett er 0 (núll) þar sem ekki á að vera fjárhæð. Til þess að leiðrétta þannig villur þarf að þurrka út þær upplýsingar sem ekki eiga að vera.